Turistë aventurierë nga Republika Çeke kanë zgjedhur lumin Shkumbin dhe peizazhet natyrore shqiptare për të kaluar pushime ndryshe, mes packrafting, kampingut dhe eksplorimit të zonave malore. Grupi i miqve, që prej rreth një dekade viziton Shqipërinë, këtë vit po përshkon segmente të lumit deri në 20 kilometra, duke e kthyer udhëtimin në një eksperiencë unike mes natyrës së egër.
Ata shprehen se Shqipëria mbetet një destinacion autentik, ku mund të kombinohen aventura, sportet ujore dhe jeta në natyrë. Pas reshjeve të fundit dhe rritjes së nivelit të ujit, turistët kanë treguar kujdes në segmentet më të vështira të Shkumbinit, duke ndaluar në zonat me rrezik më të lartë.
Vizitorët çekë vlerësojnë mikpritjen shqiptare, ushqimin tradicional dhe mundësitë e shumta për aktivitete outdoor, nga kajaku te kampingu në male. Ata tregojnë se kanë eksploruar më parë lumenj dhe zona të ndryshme të Shqipërisë, ndërsa shprehen të impresionuar nga natyra, tradita dhe historia lokale.
Për ta, Shqipëria është një vend ideal për pushime gjatë gjithë vitit, ku aventura, peizazhi dhe kultura ndërthuren në një eksperiencë të veçantë. Turistët theksojnë se do të rikthehen sërish për të zbuluar më shumë nga thesaret natyrore dhe historike që vendi ynë ofron.
