Avokatja Refxhei Tola ka deklaruar se kanë mbërritur denoncime të tjera ndaj mjekut Niko Nunka, për raste të ngjashme abuzimi seksual, disa prej të cilave datojnë deri 33 vite më parë, ndërsa rasti më i fundit është raportuar një vit më parë.
Sipas saj, bëhet fjalë për një rast të përsëritur, çka e rëndon edhe më shumë situatën dhe ngre pikëpyetje mbi faktin se si mjeku ka vijuar të ushtrojë profesionin për kaq vite në sistemin spitalor, duke ofruar shërbime për vajza dhe djem.
Tola falënderoi 21-vjeçaren që denoncoi rastin, duke e cilësuar guximin e saj si një hap të rëndësishëm për të nxjerrë në dritë ngjarje të tilla. Ajo i bëri thirrje drejtësisë që të reagojë dhe të marrë masa ndaj rasteve të abuzimeve seksuale.
Avokatja deklaroi gjithashtu se studioja ligjore që ajo përfaqëson është e gatshme të asistojë çdo denoncim tjetër që mund të vijë nga gra apo vajza të tjera, duke garantuar anonimatin e tyre.
Sipas saj, ka indicie se mjeku ka ndjekur të njëjtën praktikë pune me vajzat që i janë drejtuar për vizita, ndërsa theksoi se institucioni spitalor nuk ka marrë masa administrative edhe pse, sipas saj, ka pasur sinjale të vazhdueshme për sjelljen e tij.
Tola shtoi se pala mbrojtëse ende nuk është njohur me dosjen hetimore, pasi, sipas saj, prokuroria nuk ua ka vënë në dispozicion materialet e çështjes, ndërsa apeloi që të gjitha gratë dhe vajzat që pretendojnë se janë abuzuar të denoncojnë rastet e tyre.
