Fibank vijon të mbështesë projekte me ndikim afatgjatë në zonën e Prespës, duke kontribuar në zhvillimin e turizmit dhe promovimin e vlerave historike e natyrore të rajonit.
Në bashkëpunim me Bashkia Pustec, një nga iniciativat më të fundit ka qenë vendosja e një moli në ishullin e Maligradit, aty ku ndodhet edhe Kisha e Shën Mërisë, një monument me vlera të rralla historike i ndërtuar që në vitin 1369.
Moli i ri pritet të lehtësojë aksesin e vizitorëve dhe turistëve drejt ishullit, duke krijuar më shumë mundësi për eksplorimin e kësaj perle të trashëgimisë kulturore në zemër të liqenit të Prespës.
Pak kohë më parë, Fibank financoi gjithashtu rikonstruksionin e një varke në pronësi të Bashkisë Pustec, e cila përdoret për transportin e vizitorëve drejt ishullit të Maligradit, si edhe për shëtitje turistike përgjatë brigjeve të veçanta të liqenit të Prespës.
Ishulli i Maligradit konsiderohet një nga destinacionet më të veçanta turistike në juglindje të vendit. Shpellat, shkëmbinjtë karakteristikë, plazhet ranore e shkëmbore, si dhe Kisha e Shën Mërisë me afresket e saj të vjetra dhe gjurmët arkeologjike, tërheqin çdo vit vizitorë vendas dhe të huaj.
Përmes këtyre investimeve, Fibank synon të mbështesë potencialin turistik të zonës dhe të promovojë më tej Prespën si një destinacion unik natyror dhe kulturor, duke ftuar turistët të zbulojnë bukuritë që ofron kjo zonë e veçantë mes Shqipërisë, Maqedonisë së Veriut dhe Greqisë.
