Hetimet proaktive të Prokurorisë pranë Gjykatës së Shkallës së Parë të Juridiksionit të Përgjithshëm Korçë kanë çuar në goditjen e një rasti të kultivimit dhe përpunimit të lëndëve narkotike në fshatin Vreshtas, Bashkia Maliq, ku një shtetas është arrestuar dhe një tjetër është shpallur në kërkim.
Në kuadër të operacionit, të zhvilluar në bashkëpunim me Drejtorinë Vendore të Policisë Korçë dhe Seksionin për Hetimin e Narkotikëve, u zbulua një ambient i fshehtë i ndërtuar nën një kotec shpendësh, i përshtatur posaçërisht për kultivimin, tharjen dhe përpunimin e bimëve narkotike cannabis sativa.
Sipas hetimeve, ambienti nëntokësor ishte organizuar në mënyrë profesionale, me sistem termoizolimi, ventilimi, ndriçimi, ngrohjeje dhe ujitjeje, duke krijuar kushte të posaçme për rritjen dhe përpunimin e lëndës narkotike. Në të u gjetën zona të veçanta për tharjen e bimëve, dhjetëra vazo me mbetje kërcelli, si dhe pajisje të shumta ndihmëse.
Nga kontrollet u sekuestruan rreth 5.4 kilogramë lëndë e dyshuar narkotike cannabis sativa në forma të ndryshme, një sasi e vogël e dyshuar kokainë, peshore elektronike, llampa speciale, sistem ventilimi, si dhe një armë në formën e pistoletës me bombol gazi të kompresuar.
Hetimet zbuluan gjithashtu se ambienti furnizohej me energji elektrike në mënyrë të paligjshme, përmes lidhjes direkte me rrjetin e shpërndarjes.
Prokuroria e Korçës po vijon hetimet për zbardhjen e plotë të aktivitetit kriminal dhe identifikimin e personave të tjerë të përfshirë në këtë rast.
