Korça po tërheq gjithnjë e më shumë turistë jo vetëm për historinë, muzeumet dhe kulinarinë, por edhe për trashëgiminë e pasur kulturore. Një grup turistësh nga Gjermania vizituan së fundmi Qendrën e Artit dhe Kulturës, ku u njohën nga afër me vallet tradicionale shqiptare.
Nën ritmet e muzikës popullore korçare, vizitorët mësuan hapat bazë të valleve tona, duke e cilësuar përvojën si emocionuese dhe të veçantë. Ata vlerësuan elegancën, energjinë dhe frymën bashkuese që përcjell folklori shqiptar.
Sipas përfaqësuesve të Qendrës së Artit dhe Kulturës, interesimi i turistëve për folklorin, kostumet tradicionale dhe vallet popullore është në rritje. Vizitorët jo vetëm mësojnë traditat shqiptare, por shpesh ndajnë edhe kulturën e vendeve nga vijnë, duke krijuar një urë të bukur shkëmbimi kulturor.
Nga Pazari i Vjetër dhe muzetë, deri te muzika dhe vallet tradicionale, Korça po u ofron turistëve një eksperiencë të plotë kulturore, që shumë prej tyre premtojnë ta çojnë me vete edhe përtej kufijve të Shqipërisë.
