Forca të shumta policie kanë rrethuar zonën në rrugën “Petraq Shomo”, në lagjen 18 të qytetit të Korçës, pas një telefonate që sinjalizonte praninë e një objekti të dyshimtë brenda një automjeti të parkuar.
Menjëherë pas njoftimit, shërbimet e Policisë mbërritën në vendngjarje, izoluan perimetrin për arsye sigurie dhe po presin mbërritjen e forcave të specializuara për të kryer kontrollin dhe verifikimin e pakos së dyshimtë.
Paralelisht, grupet hetimore kanë sekuestruar pamjet filmike të kamerave të sigurisë nga banesa dhe biznese pranë zonës, me qëllim identifikimin e lëvizjeve të dyshimta dhe sqarimin e plotë të rrethanave të ngjarjes.
Dyshimet paraprake lidhen me një pako të lënë brenda mjetit, ndërsa autoritetet po ndjekin procedurat standarde të sigurisë për raste të tilla. Deri në përfundim të kontrollit, policia u ka bërë thirrje qytetarëve të shmangin lëvizjet në këtë segment rrugor.
