Rënie e ndjeshme e numrit të blegtorisë po shënohet në juglindje të vendit, duke ngritur shqetësime serioze për të ardhmen e këtij sektori jetik për ekonominë rurale. Sipas burimeve, në Qarku Korçë nga mbi 300 mijë krerë bagëti në vitin 2021, aktualisht numri ka rënë me rreth 70 mijë më pak në vitin 2026.
Situata paraqitet edhe më kritike në Maliq, ku vetëm brenda një viti raportohen rreth 5000 krerë më pak bagëti të imta. Rënia është e theksuar edhe në Korçë dhe Kolonjë, zona që tradicionalisht mbështeten te blegtoria, sidomos në territoret malore.
Blegtorët identifikojnë disa faktorë kryesorë që po ndikojnë në këtë rënie: mungesa e subvencioneve konkurruese krahasuar me vendet e rajonit, çmimi i ulët i qumështit, kostot e larta të marrjes së tokave me qira dhe shpenzimet në rritje për shërbimet veterinare.
Kasëm Sardi, një nga fermerët në njësinë administrative Pirg, shprehet se situata është bërë e papërballueshme: “Çmimet janë të ulëta dhe subvencionet minimale. Dikur kisha më shumë bagëti, sot kam vetëm 200. Kostot janë rritur shumë dhe numri i bagëtive po zvogëlohet vazhdimisht.”
Ndërkohë, Arjol Lalollari thekson se mungesa e fitimit po i shtyn fermerët drejt braktisjes së aktivitetit: “Me çmimet aktuale të qumështit nuk ka fitim. Kam marrë toka me qira, por është e vështirë të përballohen kostot. Po mendoj ta mbyll fermën dhe të emigroj.”
Të dy blegtorët e zhvillojnë aktivitetin në mënyrë familjare, pasi mungesa e fuqisë punëtore dhe pagat e larta të barinjve e bëjnë të pamundur zgjerimin e fermave.
Rënia e blegtorisë në juglindje po shihet si një sinjal alarmi për sektorin bujqësor, ndërsa fermerët kërkojnë mbështetje më të madhe dhe politika konkrete për të frenuar këtë trend negativ.
