Bashkëkryetari i Komisionit të Posaçëm për Reformën Administrativo-Territoriale, Arbjan Mazniku ka deklaruar nga Korça se reforma që po diskutohet aktualisht do të ketë ndikim afatgjatë në zhvillimin e vendit dhe funksionimin e pushtetit vendor.
Gjatë dëgjesës së 11-të publike për reformën territoriale, Mazniku theksoi se pas 10 vitesh nga reforma e vitit 2014 është momenti i duhur për të analizuar arritjet dhe mangësitë e saj, me qëllim përmirësimin e mëtejshëm të sistemit të qeverisjes vendore.
Sipas tij, objektivi kryesor mbetet forcimi i bashkive dhe rritja e kapaciteteve të tyre për të ofruar shërbime më cilësore për qytetarët.
“Sfida që kemi përpara është se si t’i bëjmë bashkitë të kenë të gjitha mjetet dhe kapacitetet e nevojshme për t’i kryer detyrat e tyre më mirë. Pas 10 vitesh nga reforma e vitit 2014, ky është momenti i duhur për një analizë të thelluar të asaj që ka funksionuar dhe çfarë duhet ndryshuar”, u shpreh Mazniku.
Ai shtoi se aktualisht ka bashki që nuk arrijnë të ushtrojnë plotësisht funksionet e parashikuara me ligj, duke sjellë sipas tij zhvillim të pabarabartë mes territoreve.
“Nga 36 funksione buxhetore që kanë bashkitë, disa realizojnë vetëm 9, 10 apo 12 prej tyre. Kjo lidhet me faktorë të ndryshëm, përfshirë madhësinë e bashkisë dhe kapacitetin menaxhues”, tha ai.
Mazniku theksoi gjithashtu se forcimi i pushtetit vendor është i lidhur ngushtë me procesin e integrimit evropian, duke nënvizuar nevojën që bashkitë të jenë të afta të hartojnë dhe zbatojnë projekte sipas standardeve të BE-së.
“Procesi i integrimit evropian hap një dritare mundësish për bashkitë, por kërkon institucione vendore të forta dhe funksionale”, u shpreh ai.
Sipas Maznikut, periudha 2027–2030 do të jetë vendimtare për përgatitjen e bashkive për të përthithur fonde dhe financime evropiane, ndërsa reforma aktuale pritet të ketë ndikim të drejtpërdrejtë në dekadat e ardhshme.
“Ky proces nuk ndikon vetëm në të tashmen, por në një dekadë të tërë. Duhet të ndërtojmë bashki që janë të gatshme të integrohen me Evropën”, deklaroi ai.
Komisioni i Posaçëm për Reformën Administrativo-Territoriale pritet të paraqesë raportin përfundimtar në Kuvend brenda afatit të përcaktuar, më 15 korrik.
