Korça dhe fshatrat turistike të Voskopojës, Boboshticës dhe Dardhës këtë vit kanë tërhequr turistë të huaj nga vendet europiane dhe jo vetëm. Operatoret turistik raportojnë se më shumë se 85 për qind e vizitorëve gjatë këtij sezoni kanë qenë të huaj.
Anila Kapurani, administratore e një hoteli në qendër të qytetit të Korçës, tha se rritja e turistëve të huaj dy vitet e fundit ka ardhur si rezultat i bashkëpunimit me agjenci vendase dhe të huaja.
“Tendeca vitet e fundit është se agjencite lidhen me hotelet dhe sjellin turistët. Turistët e huaj kërkojnë standartin ndaj punojnë agjencite me hotelet e mëdha. Franca, Gjermania, Bullgaria, vitet I fundit kemi turistët e Izraelit, të dendur janë turistët nga Greqia dhe trend të madh kanë kërkesat e agjencive kroate. Kemi disa vjeçare marrëdhëniet me agjencitë turistike, deri në fund të Nëntor kemi rezervime. ”
Klarita Duni, menaxhere e një hoteli në Pazarin e Vjetër, konfirmon se këtë vit ka pasur një rritje të vizitorëve të huaj, duke shtuar se tashmë kanë nisur regjistrimet për vitin 2026.
” Kjo ka ardhur ardhur sepse i është bërë reklamë shumë e mirë vendit tonë e turizmit në Shqipëri sidomos Korçës, bashkëpunimi me agjencitë e huaja dhe vendase është rritur. Reklama dhe review ndikojnë shumë dhe kemi patur agjenci të huaja që sjellin turistët e huaj. Gjithmonë e në rritje. Rezervime kanë nisur e për vitin 2026 e përtej vitit 2026″
Turistët e huaj tregojnë interes të veçantë për vizitimin e vendeve të trashëgimisë kulturore dhe arkeologjike të Korçës dhe rrethinave.
