Distileri që përdorin përzjerësa dhe aroma të ndryshme të skaduara, miliona lekë gjobë dhe sekuestime janë rezultat i një aksioni të AKU Tiranë.
AKU Tiranë dhe krimi ekonomik i uniformave blu të kryeqytetit kanë zhvilluar një operacion të përbashkët në një distileri në Vaqarr ditën e djeshme.
Sipas të dhënave zyrtare të policisë kontrrolli është ushtruar në subjektin E.H, në rrugën Sali Shkreta, Vaqarr, Tiranë.
Burimet zyrtare bënë me dije se ndaj subjektit janë vendosur disa gjoba me vlerë dhjetra milionë lekë si dhe janë sekuestruar si provë produkte ushqimore të skaduara.
Janë bllokuar ëmbëlsues, përzjerës, aroma të ndryshme në sasi disa dhjetra kilogramë të cilat u çuan për asgjësim.
Gjatë kontrollit në ambientet e subjektit u konstatuan gjithashtu produkte ushqimore dhe lëndë të para, në enë plastike dhe qelqi, pa etiketa apo informacion identifikues. Janë gjetur qindra litra pije si vodka, liker qershie, fernet, “esencë uzo”, aromë mente, aromë banane dhe aromë kafeje.
Janë konstatuar lëndë si ekstrakt portokalli, ekstrakt kumbulle, ekstrakt portokalli, shishe me aromë rumi, shishe me aromë gin, karamel, etj.
Shumë nga produktet, sipas inspektorëve të AKU, janë çuar për tu asgjësuar sepse është i pamundur identifikimi i origjinës së tyre.
Disa prej produkteve janë çuar për analiza për të verifikuar më tej cilësinë e tyre.
Qindra litra pije të ndryshme alkolike të sekuestruara, një pjesë e sasisë është çuar për asgjësim, ndërkohë policia ka filluar hetimin penal për pronarin e distilerisë.
