Trajneri i Skënderbeut, Julian Ahmataj, shprehu pakënaqësinë e tij për gjykimin pas barazimit me Tiranën, duke theksuar se skuadra korçare meritonte më shumë nga kjo ndeshje.
Ahmataj vlerësoi paraqitjen e ekipit, por u ndal edhe te një episod i pretenduar për penallti, duke deklaruar se kjo nuk është hera e parë që Skënderbeu penalizohet në raste të tilla.
“Na mungon një penallti, që është një prekje me dorë. Për të protestuar, protestojnë të tjerë. Na ka ndodhur edhe me Dinamon, edhe këtu. Në katër javë janë dy raste që kanë ndodhur të pastra”, u shpreh Ahmataj pas ndeshjes.
Trajneri korçar tha se nuk është në karakterin e tij të bëjë zhurmë apo të protestojë me tone të larta, duke shtuar se vendimet u takojnë atyre që kanë përgjegjësinë për gjykimin.
Në lidhje me ndeshjen, Ahmataj theksoi se Skënderbeu krijoi raste dhe luajti me intensitet, por ende po vuan mungesën e saktësisë përpara portës.
“Na vjen shumë keq që nuk e mbyllëm me fitore. Mendoj se kemi bërë një ndeshje shumë të mirë dhe meritonim më shumë”, deklaroi ai.
