Edicioni i 7-të i “Mokra n’Fest” ka mbledhur mijëra banorë, emigrantë dhe vizitorë në një festë që solli në vëmendje vlerat, traditat, kulturën dhe historinë e trevës së Mokrës.
Nga guri i Mokrës dhe mullinjtë e vjetër me ujë, te peizazhet e jashtëzakonshme, gatimet tradicionale, punimet artizanale, këngët, vallet, zakonet e dasmës mokrare dhe dollia qindra-vjeçare, festa përcolli identitetin autentik të kësaj zone. Për herë të parë në këtë edicion, traditës iu bashkuan edhe aktivitetet e sporteve ujore.
Një prej elementeve më interesante ishte historia e gurëve mbi 400-vjeçarë të mokrës, të ruajtur nga Shefqet Lushka, dëshmi e një tradite të hershme të bluarjes së drithit në këtë trevë.
Mokra n’Fest u kthye gjithashtu në një moment të veçantë bashkimi për mokrarët e ardhur nga vende të ndryshme të Shqipërisë dhe nga emigracioni. Mes pjesëmarrësve kishte edhe të moshuar të ardhur nga SHBA, Elbasani dhe Vlora, duke dëshmuar lidhjen e fortë me vendlindjen.
Kryetari i Bashkisë Pogradec, Ilir Xhakolli, vuri theksin jo vetëm tek promovimi i Mokrës si një zonë autentike turistike, por edhe tek investimet e realizuara dhe ato që pritet të vijojnë në këtë trevë.
“Mokra n’Fest” është tashmë një nga aktivitetet që promovon më së miri traditat lokale, duke bashkuar kulturën, historinë, gastronominë, folklorin dhe turizmin. Vetëm pak muaj më parë, Ministria e Turizmit e vlerësoi këtë festë si të dytën më të mirë në Shqipëri për promovimin e traditave.
Një festë që dëshmon se Mokra nuk është vetëm një vend me histori e tradita, por edhe një trevë njerëzish që dinë të ruajnë rrënjët, të mikpresin dhe të festojnë së bashku.
