Çmimi i naftës në pikat e karburanteve në vend ka pësuar një tjetër rritje, duke arritur në rreth 214 lekë për litër, nga 206 lekë që ishte më parë. Shtrenjtimi vjen në një kohë kur Bordi i Transparencës është shpërbërë, ndërsa qytetarët shprehen se rritja është e pajustifikuar, veçanërisht kur në bursat ndërkombëtare çmimi i naftës ka shënuar rënie.
Në Korçë, qytetarët kërkojnë më shumë kontroll mbi tregun e karburanteve dhe mekanizma që të garantojnë transparencë në përcaktimin e çmimeve. Sipas tyre, çdo rritje e naftës ndikon drejtpërdrejt në buxhetin familjar dhe reflektohet në çmimet e mallrave dhe shërbimeve.
Ndërkohë, tregtarët e frutave dhe perimeve në qytet thonë se deri tani nuk është vënë re një rritje e ndjeshme e çmimeve të produkteve të sezonit. Sipas tyre, më të kushtueshme mbeten produktet jashtë sezonit dhe ato të importit, ndërsa ndikimi i rritjes së çmimit të karburanteve në treg nuk është reflektuar ende në mënyrë të dukshme.
Qytetarët kërkojnë që institucionet përgjegjëse të monitorojnë tregun dhe të sigurojnë që çmimet e karburanteve të pasqyrojnë zhvillimet reale në tregjet ndërkombëtare, duke shmangur rritjet e pajustifikuara që rëndojnë ekonominë e familjeve.
