Julian Ahmataj është rikthyer në drejtimin e Skënderbeut, teksa trajneri ka nisur tashmë seancat stërvitore me ekipin korçar. Rikthimi i tij në Korçë vjen me një objektiv të qartë: krijimin e një skuadre konkurruese dhe ruajtjen e qetësisë në Kategorinë Superiore, ndërsa klubi përgatitet për vitet e ardhshme pas përfundimit të dënimit të UEFA-s.
Ahmataj shprehet se këtë herë projekti është ndryshe, me fokus ndërtimin e një grupi me baza të forta që do t’i shërbejë Skënderbeut në vazhdimësi.
“Objektivi është të ndërtohet një skuadër e aftë që, me afrimin e faljes, të jetë në nivelet që e kemi parë gjithmonë. Skënderbeu do ndërtojë një skuadër me baza të forta, që do të përforcohet sa më shumë në çdo merkato. Kur isha herën e parë isha në një moment të keq për Skënderbeun, por isha edhe më i ri. Tani është diçka tjetër”, u shpreh Ahmataj.
Në ditët e para të përgatitjeve, skuadra nuk është ende e plotë, ndërsa trajneri konfirmon se priten afrime të tjera.
“Nuk mund të jetë gati një ekip në ditën e dytë të stërvitjes. Është një skuadër që po formohet. Ka lojtarë që i kanë mbyllur marrëveshjet dhe do të bashkohen me ekipin në javën e parë të fazës përgatitore”, tha ai.
Skënderbeu vjen pas një sezoni në Kategorinë e Parë, ku u rendit i dyti dhe humbi titullin kampion në minutat e fundit përballë Laçit. Tashmë klubi korçar kërkon të rikthehet gradualisht në nivelet më të larta të futbollit shqiptar.
