Një ngjarje e rëndë raportohet të ketë ndodhur në orët e para të mëngjesit në zonën e Bodës së Lozhanit, ku sipas informacioneve paraprake një efektiv policie ka humbur jetën dhe një tjetër ka mbetur i plagosur gjatë një operacioni policor.
Sipas të dhënave paraprake, një grup efektivësh ishte nisur drejt një zone të thellë malore për kapjen e një personi të shpallur në kërkim dhe të konsideruar me rrezikshmëri të lartë. Gjatë afrimit pranë vendit ku dyshohej se ndodhej personi në fjalë, janë dëgjuar të shtëna me armë zjarri.
Nga të shtënat, një efektiv policie ka mbetur i vrarë në krye të detyrës, ndërsa një tjetër është plagosur dhe po merr ndihmën mjekësore.
Burime pranë policisë bëjnë me dije se autori i dyshuar është identifikuar si Violand Bacellari, një person i njohur për autoritetet për përfshirje në ngjarje kriminale të mëparshme. Megjithatë, autoritetet nuk kanë dalë ende me një njoftim zyrtar mbi rrethanat e plota të ngjarjes.
Forca të shumta policie vijojnë operacionin në zonë, ndërsa pritet një reagim zyrtar nga strukturat ligjzbatuese.
