Një prej monumenteve më të rëndësishme të trashëgimisë kulturore në juglindje të Shqipërisë, Kulla e Turanit, ka hyrë në një fazë të rëndësishme restaurimi, duke dalë tashmë nga lista e objekteve me rrezik të lartë shembjeje.
Pas shqetësimeve të ngritura muaj më parë për gjendjen e amortizuar të monumentit, kanë nisur punimet për konsolidimin dhe restaurimin e kullës. Investimi financohet nga Instituti Kombëtar i Trashëgimisë Kulturore dhe synon fillimisht sigurimin e strukturës së objektit, i cili prej vitesh paraqiste probleme serioze në çati dhe në pjesën e qemerit.
Projekti është hartuar në bashkëpunim me Drejtoria Rajonale e Trashëgimisë Kulturore Korçë, ndërsa punimet kanë hyrë në fazën e parë të ndërhyrjes. Sipas drejtoreshës së Trashëgimisë Kulturore në Korçë, Amanda Cici, kjo fazë pritet të zgjasë rreth katër muaj dhe do ta nxjerrë përfundimisht objektin nga rreziku. Më pas do të nisë faza e dytë, e cila parashikon restaurimin e elementëve arkitektonikë dhe rikthimin e vlerave të plota historike e estetike të monumentit.
Pas përfundimit të investimit, Kulla e Turanit do të bëhet e aksesueshme për vizitorët dhe turistët, duke u kthyer në një tjetër destinacion të rëndësishëm të turizmit kulturor në qarkun e Korçës.
E ndërtuar në shekullin XIX, Kulla e Turanit mbetet e vetmja kullë fushore e ruajtur në juglindje të vendit dhe konsiderohet një monument me vlera të veçanta historike, arkitekturore dhe identitare për zonën. Restaurimi i saj pritet të kontribuojë jo vetëm në ruajtjen e trashëgimisë kulturore, por edhe në pasurimin e ofertës turistike të rajonit.
