Shërbimet e Policisë Rrugore në Korçë arrestuan në flagrancë shtetasin A. Z., 31 vjeç, banues në fshatin Memëlisht, Pogradec, pasi duke drejtuar automjetin tip “Volkswagen”, ka humbur kontrollin dhe është përplasur me murin anësor të tunelit. Si pasojë, janë dëmtuar drejtuesi i mjetit dhe pasagjeri E. T., 32 vjeç, i cili u transportua në Spitalin e Traumës në Tiranë për mjekim të specializuar. Nga verifikimet rezultoi se drejtuesi i mjetit ishte në gjendje të dehur.
Gjithashtu, Policia Rrugore arrestoi në flagrancë edhe shtetasit:
- R. M., 30 vjeç, banues në Maliq, pasi në aksin rrugor “Pogradec–Korçë”, pranë fshatit Çërravë, nuk iu bind urdhrit të punonjësve të policisë për të ndaluar. Pas ndalimit, u konstatua se drejtonte automjetin me targa greke pa leje drejtimi;
- E. B., 37 vjeç, banues në fshatin Neviçisht, Korçë, i kapur duke drejtuar automjetin në gjendje të dehur në aksin “Korçë–Bilisht”, pranë fshatit Dishnicë;
- D. B., 41 vjeç, banues në Pogradec, i kapur duke drejtuar automjetin pa targa dhe në gjendje të dehur.
Ndërkohë, shërbimet e Komisariatit të Policisë Korçë referuan materialet në Prokurori dhe nisi procedimi penal për shtetasin I. S., 43 vjeç, banues në Korçë, pasi dyshohet se ka vjedhur disa vetrata duralumini në ambientet e jashtme të një lokali në lagjen nr. 3.
Po ashtu, shërbimet e Komisariatit të Policisë Maliq referuan materialet në Prokurori për shtetasen V. Sh., 34 vjeçe, banuese në fshatin Pojan, Maliq, e dyshuar për ushtrim dhune fizike ndaj nënës së saj, e cila është pajisur me urdhër mbrojtjeje.
Më datë 12.12.2025, shtetasi A. L., 64 vjeç, banues në Korçë, ka kallëzuar se Gj. L., 65 vjeç, ka fyer me fjalë vajzën e tij të mitur.
Po në këtë datë, shtetasi A. B., 64 vjeç, banues në Pogradec, me profesion avokat, ka kallëzuar se në zyrën e tij ka hyrë një shtetas i panjohur dhe është konfliktuar me të. Policia po punon për identifikimin dhe kapjen e autorit.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
