Në Korçë, këtë të enjte po festohet 35-vjetori i Partisë Socialiste, ku i pranishëm është edhe kryeministri Edi Rama. Por vëmendjen e ka marrë një zonjë socialiste.
Teksa mbajti fjalën e saj, socialistja falënderoi Edi Ramën, i cili sipas saj ka merita që gratë tashmë të jenë të barabarta me burrat.
“Falënderoj kryetarin e Partisë Socialiste të Shqipërisë, Edi Rama, që ka bërë të mundur që gratë të jenë të barabarta me burrat”, tha socialistja, teksa salla shpërtheu në të qeshura.
Ndërsa në fjalimin e tij, kryeministri u ndal edhe te procesi i integrimit europian, duke deklaruar se Shqipëria ka hyrë në një fazë të re pas hapjes së kapitujve të negociatave dhe tashmë po ecën drejt mbylljes së tyre.
Po ashtu, Rama foli edhe për rolin e PS-së në forcimin e marrëdhënieve me faktorin ndërkombëtar dhe përmirësimin e imazhit të Shqipërisë në sytë e ndërkombëtarëve.
Rama: PS e ngjiti Shqipërinë edhe një majë më lart, në rrugën drejt majës që faktikisht është amaneti nga të parët dhe borxhi që u kemi fëmijëve tanë.
Ne do të vendosim së bashku flamurin kuqezi të Ismail Qemalit dhe Gjergj Kastriotit në këtë majë të lartë.
PS ka dëshmuar se është e vetmja forcë politike që mund të ketë një raport të drejtë me faktorin ndërkombëtar, me të shkuarën dhe me botën. Është krenaria jonë që, pas një periudhe të gjatë vështirësish dhe denigrimi, i kemi ngritur kokën çdo shqiptari kudo në botë.
Mbi të gjitha, është krenaria jonë që sot Shqipëria ndodhet në një fazë tjetër, pasi kemi mbyllur fazën e çeljes së të gjithë kapitujve të negociatave. Tani kemi hapur procesin e mbylljes së të gjithë kapitujve.
Ndërsa shiu filloi teksa dëgjonte se ç’ishte Shqipëria, le të vazhdojë si bereqeti që do të kemi dhe le të bjerë mbi këtë festë të 35-vjetorit të PS-së edhe këtu në Korçë, duke paralajmëruar një fitore të jashtëzakonshme si ajo që do të realizojmë të gjithë bashkë në zgjedhjet e vitit të ardhshëm.
