Në një nga momentet më të rëndësishme për arsimin parauniversitar, pikërisht në prag të provimeve të lirimit për klasat e 9-ta dhe maturës shtetërore, faqja zyrtare e Qendra e Shërbimeve Arsimore ka shfaqur probleme serioze sigurie.
Qytetarët që kanë tentuar të hyjnë në portalin e QSHA-së janë përballur me një njoftim alarmues nga shfletuesi, ku thuhet se “certifikata e sigurisë ka skaduar”. Një problem i tillë ngre pikëpyetje të forta mbi mirëmbajtjen dhe sigurinë e sistemeve shtetërore online, sidomos kur bëhet fjalë për një institucion që menaxhon procese kaq sensitive për mijëra nxënës e prindër.
Ironikisht, ndërkohë që institucionet publike shpenzojnë miliona lekë për krijimin, mirëmbajtjen dhe promovimin e platformave dixhitale, një element bazik si rinovimi i certifikatës së sigurisë duket se është neglizhuar. Ekspertët e teknologjisë e konsiderojnë këtë një procedurë rutinë që zgjat vetëm pak minuta dhe nuk duhet të lejohet të skadojë në asnjë rrethanë.
Përveç mungesës së profesionalizmit, situata krijon edhe pasiguri për përdoruesit, pasi paralajmërime të tilla mund të ngrenë dyshime për ndërhyrje të mundshme apo rrezik të të dhënave personale.
Deri më tani nuk ka asnjë reagim publik nga Ministria e Arsimit dhe Sportit apo nga QSHA mbi arsyet e këtij problemi teknik, ndërsa mijëra nxënës dhe prindër presin informacion të rëndësishëm në një periudhë vendimtare për vitin shkollor.
