Forma e votimit “për procedurë” brenda partive politike shqiptare po konsiderohet si një devijim nga standardet kushtetuese dhe demokratike, duke cenuar parimin e demokracisë konkurruese dhe llogaridhënies politike. Sipas analizës së publikuar nga Instituti i Studimeve Politike (ISP), partitë që nuk funksionojnë në mënyrë demokratike nga brenda, vështirë se mund të garantojnë demokraci dhe përgjegjshmëri në ushtrimin e pushtetit.
Në analizë theksohet se votimet formale prodhojnë “parti-lider”, të shkëputura nga nevoja për reforma dhe debat të brendshëm, ndërsa zgjedhjet reale dhe konkurruese ndihmojnë në rigjallërimin e partive, rritjen e transparencës dhe krijimin e besimit te qytetarët.
Debati merr rëndësi të veçantë në kohën kur parlamenti po diskuton ligjin për financimin politik dhe pritet të shqyrtojë edhe ligjin e ri për partitë politike. Si vend kandidat për anëtarësim në Bashkimin Europian, Shqipëria përballet me nevojën për forcimin e standardeve demokratike dhe integritetit politik.
ISP bën të ditur se ka paraqitur në komisionin e posaçëm një draft me ndryshime thelbësore në legjislacionin për partitë politike, duke synuar më shumë konkurrencë, transparencë dhe llogaridhënie në funksionimin e tyre.
Shkrimi i plotë:
ISP – Analiza e plotë
