Dyshime për një vatër infeksioni me Murtajën e Ruminantëve të Vegjël janë evidentuar në bashkinë e Ersekës. Sipas drejtorit të përgjithshëm të Autoritetit Kombëtar të Veterinarisë, Roland Mecaj, shërbimi veterinar i juglindjes ka marrë mostrat e një tufe bagëtish të dyshuara si të infektuara, të cilat janë dërguar për analiza laboratorike.
Sipas analizave të para, tufa rezulton e infektuar me murtajë, ndërsa pritet konfirmimi përfundimtar nga analizat e dyta laboratorike.
“Ky vit është specifik pasi kemi tufa që nuk shfaqin shenja klinike, por e mbartin infeksionin. Sipas analizave laboratorike fillestare kemi një konfirmim për një vatër në qarkun e Korçës, ndërsa presim analizat përfundimtare. Nëse do të kemi konfirmim, do të merren masat e nevojshme”, u shpreh Mecaj.
Nga ana tjetër, Autoriteti Kombëtar i Veterinarisë ka bërë me dije se të gjithë blegtorët që vitin e kaluar humbën tufat për shkak të Murtajës së Ruminantëve të Vegjël do të dëmshpërblehen nga shteti.
“Janë dëmtuar rreth 2200 krerë të imta dhe e gjithë vlera do të dëmshpërblehet nga buxheti i shtetit. Procesi i kalimit të vlerave financiare është në vijim”, deklaroi drejtori i AKV-së.
Vitin e kaluar, në juglindje u raportuan me qindra krerë të imta të ngordhura për shkak të këtij infeksioni. Ndërkohë, me urdhër të Ministrisë së Bujqësisë është ndaluar së fundmi shtegtimi i bagëtive nga vendet fqinje, përfshirë edhe Greqinë.
