Në Ditën Ndërkombëtare të Familjes, Avokati i Popullit Endrit Shabani, gjatë një takimi në Korçë me drejtues vendorë dhe institucione lokale, ngriti alarmin për nivelin e ulët të jetesës së familjeve shqiptare, duke theksuar se inflacioni, ndihma ekonomike e pamjaftueshme dhe mungesa e politikave konkrete po detyrojnë shumë të rinj të largohen nga vendi. Sipas tij, familja shqiptare po përballet me sfida serioze ekonomike dhe sociale, ndërsa shteti duhet të fokusohet realisht te kategoritë më në nevojë, përfshirë të moshuarit dhe qytetarët në zonat jashtë qendrës.
Shabani kritikoi gjithashtu përqendrimin e zhvillimit vetëm në Tiranë, duke kërkuar reflektim mbi reformën administrative dhe atë në drejtësi, në mënyrë që qytetarët në çdo zonë të kenë akses të barabartë në shërbime dhe drejtësi.
Duke iu përgjigjur interesit për çështjet e paraburgosurve dhe figurave të njohura politike, ai deklaroi se prioritet i institucionit të Avokatit të Popullit janë qytetarët “pa zë”, veçanërisht të paraburgosurit, të moshuarit dhe personat me probleme shëndetësore që mbahen në kushte çnjerëzore në burgjet shqiptare. Shabani bëri të ditur se vetëm në katër muajt e fundit pesë persona kanë humbur jetën në burgje, ndërsa raste të shumta tregojnë mungesë të theksuar të kujdesit shëndetësor, duke e cilësuar këtë si shkelje të rëndë të të drejtave të njeriut. Sipas tij, Shqipëria ka nivel trefish më të lartë të paraburgimit krahasuar me mesataren europiane.
