Skënderbeu ndodhet shumë pranë realizimit të objektivit madhor të sezonit, pasi në përballjen e së dielës ndaj Kastriotit mund të vulosë matematikisht ngjitjen në Kategorinë Superiore. Gjithsesi, kjo arritje lidhet edhe me rezultatin e sfidës tjetër direkte Laçi–Pogradeci, e cila mund të ndikojë në përllogaritjet finale të renditjes. Përballë korçarëve do të jetë një kundërshtar aspak komod.
Kastrioti ka treguar gjatë këtij sezoni se di t’i hapë probleme skuadrës së drejtuar nga Ernest Gjoka. Në fazën e parë, krutanët ishin pikërisht ekipi që i shkaktoi humbjen e parë Skënderbeut, në një ndeshje dramatike të përfunduar 3-2 në Fushë-Krujë. Një sinjal i qartë se kjo sfidë nuk duhet marrë lehtë. Megjithatë, panorama ndryshon ndjeshëm kur ndeshjet luhen në Korçë. Në fazën e dytë, bardhekuqtë triumfuan 2-1 falë golave të Gjinishit dhe Beshirajt, ndërsa Kastrioti vetëm sa ngushtoi shifrat në shtesë me Xhixhon. Kjo tregon forcën e Skënderbeut në shtëpi, ku shpeshherë ka diktuar ritmin dhe rezultatin.
Statistikat flasin qartë
Historiku i përballjeve mes dy skuadrave në Korçë është mjaft domethënës. Në 25 vitet e fundit, asnjë ndeshje mes Skënderbeut dhe Kastriotit e luajtur në këtë qytet nuk ka përfunduar në barazim. Bilanci është i prerë, ose fitojnë korçarët, ose surprizojnë krutanët. Në 10 sfidat e fundit në stadiumin “Skënderbeu”, vendasit kanë regjistruar 8 fitore, shpesh edhe me rezultate bindëse, ndërsa Kastrioti ka arritur vetëm 2 suksese. Një dominim i qartë që i jep besim ekipit të Gjokës për sfidën e radhës. Edhe këtë herë, një barazim duket pak i mundshëm. Skënderbeu ka motivimin maksimal, pasi një fitore mund të përkthehet në rikthim në elitë.
Përveç formës së mirë dhe mbështetjes së tifozëve, trajneri Gjoka pret shumë nga reparti ofensiv, me synimin që ndeshja të zgjidhet sa më herët dhe të shmangen dramat e minutave të fundit, që kanë shoqëruar disa prej fitoreve të fundit. Nga ana tjetër, edhe Kastrioti vjen me presionin e vet, pasi pozicionimi në zonën “play off” nuk është ende i sigurt. Kjo e bën sfidën edhe më të fortë dhe më të luftuar. Në përfundim, statistikat, forma dhe motivimi janë në anën e Skënderbeut, por futbolli ka treguar shpesh se surprizat nuk mungojnë. Korçarët duhet të japin maksimumin për të mos e lënë fatin e sezonit në dorë të llogarive apo rezultateve të rivalëve. Një hap i fundit, por që kërkon përqendrim maksimal për t’u kthyer aty ku e ndjejnë veten më mirë, në Superiore.
