Ministri i Drejtësisë, Toni Gogu, zhvilloi një seri takimesh në Korçë në kuadër të turit “Punët e Shqipërisë”, ku në qendër të diskutimeve ishte lidhja mes zhvillimit ekonomik dhe funksionimit të sistemit të drejtësisë.
Gogu u shoqërua nga Niko Peleshi, drejtues politik i qarkut dhe Kryetar i Kuvendit, Sotiraq Filo, kryetar i Bashkisë Korçë, Florinda Zegullaj, si dhe Petrika Tollkuçi.
Gjatë takimeve me operatorë turistikë, përfaqësues të komunitetit dhe profesionistë të lirë, ministri theksoi se zhvillimet pozitive si rritja e turizmit, promovimi i trashëgimisë kulturore dhe rikthimi i diasporës janë tregues të qartë të progresit, por kërkojnë mbështetje të fortë nga një sistem drejtësie funksional.
“Sot pamë dy realitete paralelisht: një zhvillim real nga njëra anë dhe problematika konkrete që lidhen me drejtësinë e përditshme nga ana tjetër,” u shpreh ai.
Sipas tij, sfidat kryesore mbeten zvarritjet në proceset gjyqësore, vështirësitë në ekzekutimin e vendimeve dhe aksesi i qytetarëve në drejtësi.
Në takimin me përfaqësues të komunitetit ligjor, u ngritën shqetësime edhe për efektet e hartës së re gjyqësore, veçanërisht lidhur me aksesin e qytetarëve dhe kohëzgjatjen e proceseve.
“Qytetarët nuk kërkojnë teori. Ata kërkojnë që çështjet të mos zvarriten, vendimet të zbatohen dhe drejtësia të jetë e aksesueshme për të gjithë,” theksoi ministri.
Gogu nënvizoi se fokusi i punës në vijim do të jetë përmirësimi i funksionimit praktik të sistemit të drejtësisë, përtej kuadrit ligjor ekzistues.
“Besimi tek shteti nuk ndërtohet me fjalë, por me drejtësi që funksionon çdo ditë,” përfundoi ai.
