Në Universitetin “Fan S. Noli” në Korçë u zhvillua veprimtaria promovuese për “Fjalorin e Madh të Gjuhës Shqipe”, një nga projektet më të rëndësishme të leksikografisë shqiptare, i hartuar nga Akademia e Shkencave e Shqipërisë si një platformë digjitale me burim të hapur për publikun.
Kjo vepër madhore synon t’u shërbejë studiuesve, pedagogëve, studentëve, mësuesve, nxënësve dhe të gjithë përdoruesve të gjuhës shqipe, duke ofruar një bazë të gjerë dhe të aksesueshme online.
Rektori i Universitetit “Fan S. Noli”, Prof. Dr. Lorenc Ekonomi, dhe sekretarja shkencore e Akademisë së Shkencave, Prof. Dr. Anila Hoda, vlerësuan rëndësinë e këtij projekti për ruajtjen, pasurimin dhe standardizimin e gjuhës shqipe.
Sipas organizatorëve, fjalori është drejt përfundimit në pjesën më të madhe të tij dhe tashmë është bërë i përdorshëm për publikun në platformën online, ku për rreth një vit do të mblidhen komente dhe vlerësime mbi cilësinë e tij. Pas kësaj faze, “Fjalori i Madh i Gjuhës Shqipe” do të botohet edhe në version të printuar, për të qenë një pasuri e aksesueshme për të gjithë shqiptarët.
