Një konflikt i dhunshëm mes disa të rinjve në lagjen nr. 2 të Korçës ka përfunduar me një të mitur të plagosur dhe disa persona të proceduar penalisht. Policia bën me dije se, në vijim të hetimeve për ngjarjen e ndodhur një ditë më parë, është arrestuar në flagrancë shtetasi A. P., 19 vjeç, i dyshuar për “plagosje të rëndë me dashje”, “prishje të rendit dhe qetësisë publike” në bashkëpunim, si dhe “mbajtje pa leje të armëve të ftohta”.
Sipas hetimeve paraprake, disa të rinj janë konfliktuar fizikisht dhe me sende të forta për motive të dobëta. Gjatë përplasjes, 19-vjeçari dyshohet se ka goditur me mjet prerës një 15-vjeçar, i cili ndodhet në spital, jashtë rrezikut për jetën.
Për këtë ngjarje, materialet janë referuar në Prokurori edhe për shtetasit A. M., 18 vjeç, si dhe për tre të mitur të tjerë, dy 17-vjeçarë dhe një 15-vjeçar, të gjithë banues në Korçë. Në cilësinë e provës materiale, policia sekuestroi një automjet dhe një send të fortë prej druri, që dyshohet se është përdorur gjatë konfliktit.
Në një tjetër rast, Policia e Korçës arrestoi në flagrancë shtetasin E. H., 18 vjeç, pasi u kap jashtë banesës, duke thyer masën e sigurisë “arrest në shtëpi” të vendosur më parë për veprën penale “vjedhja”.
Ndërkohë, specialistët e qarkullimit rrugor arrestuan shtetasin A. G., 47 vjeç, i cili u kap në aksin “Korçë-Mborje” duke drejtuar automjetin në gjendje të dehur.
Po ashtu, në Pogradec nisi procedimi penal ndaj shtetasit Dh. M., 56 vjeç, banues në Memëlisht, pasi u konstatua duke kryer punime ndërtimi pa leje.
Në Devoll, nisi procedimi ndaj një 42-vjeçari nga Cangonji, i dyshuar se ka dhunuar fizikisht një 70-vjeçar për motive të dobëta.
Ndërsa në Kolonjë dhe Maliq, policia referoi materialet në Prokurori për dy raste të dhunës në familje. Dy gratë e dhunuara janë pajisur me urdhër mbrojtjeje.
Materialet procedurale i kaluan Prokurorisë së Korçës për veprime të mëtejshme.
