Perikli Qirjazi është nderuar me titullin “Qytetar Nderi” nga Kolonjë, në vlerësim të kontributit të tij të çmuar në shkencat gjeografike dhe promovimin e vlerave të kësaj krahine dhe të gjithë Shqipëri.
Gjeografi i njohur falënderoi institucionet vendore për këtë vlerësim, ndërsa theksoi rëndësinë e një projekti ambicioz: krijimin e enciklopedisë së Kolonjës. Sipas tij, kjo vepër do të shërbejë për të pasqyruar pasuritë dhe identitetin e krahinës.
Në fjalën e tij, ai u shpreh se me mbështetjen e komunitetit kolonjar, kjo enciklopedi do të realizohet në mënyrën më cilësore, duke e renditur Kolonjën ndër të paktat bashki që kanë një vepër të tillë shkencore.
Nga ana tjetër, kryetari i bashkisë, Erion Isai, konfirmoi mbështetjen institucionale për këtë projekt, duke vlerësuar gjithashtu rolin dhe trashëgiminë e familjes Qirjazi në historinë dhe emancipimin shoqëror të vendit.
Në fjalën e tij, Isai theksoi kontributin e jashtëzakonshëm të kësaj familjeje ndër vite, duke e cilësuar profesor Qirjazin si një figurë që i ka qëndruar besnik shkencës dhe identitetit kombëtar.
82-vjeçari Perikli Qirjazi numëron dhjetëra botime shkencore dhe konsiderohet një nga emrat më të rëndësishëm të gjeografisë shqiptare, ndërsa ky vlerësim në vendlindjen e tij shënon një moment të veçantë në karrierën dhe jetën e tij.
