Një sasi e konsiderueshme lënde narkotike është sekuestruar në pikën e kalimit kufitar të Kapshticës, si rezultat i një operacioni të përbashkët mes Drejtorisë Vendore të Policisë Korçë dhe Drejtorisë së Kufirit dhe Migracionit.
Sipas burimeve paraprake, një shtetas grek është ndaluar nga shërbimet e policisë pasi dyshohej se transportonte drogë të fshehur në automjet. Gjatë kontrollit të ushtruar me skaner, u zbulua një hapësirë e modifikuar në mjet, ku ishte fshehur lënda narkotike.
Nga verifikimet rezultoi se bëhej fjalë për rreth 33.8 kilogramë lëndë të dyshuar kanabis sativa, e cila u sekuestrua në cilësinë e provës materiale.
Dyshohet se shtetasi grek e kishte siguruar drogën në territorin shqiptar dhe synonte ta transportonte drejt Greqisë. Ai kishte planifikuar të kalonte fillimisht nga pika kufitare e Goricës drejt Maqedonisë së Veriut, për të shmangur kontrollin me skaner, dhe më pas të hynte në Greqi.
Ndërhyrja në kohë e specialistëve për hetimin e narkotikëve bëri të mundur zbulimin dhe goditjen e këtij rasti të trafikut ndërkombëtar të drogës.
Shtetasi është arrestuar, ndërsa hetimet vijojnë për identifikimin e personave të tjerë të përfshirë në këtë aktivitet kriminal. Pritet edhe njoftimi zyrtar nga policia për detaje të mëtejshme.
