Ky është tingulli që ka shoqëruar 70-vjeçarin Xhavit Hyko për gjysmë shekulli në zanatin e tij të kovaçit.
Sot ai është i vetmi hekurpunues në gjithë zonën e Mokrës, e cila ka pasur me dhjetëra të tjerë, por shpopullimi dhe braktisja e bujqësisë kanë bërë që të mbijetojë vetëm 70-vjeçari, pasioni i të cilit për këtë zanat vijon edhe sot. Madje ky zanat duket sikur i lehtëson edhe sëmundjen që ka.
Veglat e punuara nga Xhaviti janë të shpërndara jo vetëm në Mokër, por thuajse në të gjithë vendin. Xhavitit nuk i mungon as mikpritja, veçanërisht për mysafirët që vijnë nga larg.
Ndërsa shprehet se sa të jetë në këmbë këtë zanat nuk e lë, 70-vjeçari na tregon se është edhe një njeri shumë i lumtur me familjen e tij dhe për faktin që këtë zanat po ia trashëgon edhe të birit.
