Policia e Korçës ka ndaluar një 62-vjeçar të shpallur në kërkim për dhunë në familje dhe shkelje të vendimit të gjykatës. Bëhet fjalë për shtetasin P. M., banues në fshatin Liqenas, Pustec, i cili dyshohet se ka ushtruar dhunë ndaj bashkëshortes së tij, e pajisur me urdhër mbrojtjeje, si dhe ndaj djalit të saj.
Ndërkohë, materialet u referuan në Prokurori edhe për një 17-vjeçare, banuese në Korçë, për veprën penale “Kanosja për të mos kallëzuar”. Sipas Policisë, ajo dyshohet se ka kanosur me telefon një 14-vjeçare, që të tërhiqte kallëzimin e bërë ndaj një shoqeje të saj, pas një konflikti mes tyre.
Në Pogradec ka nisur procedimi penal edhe për shtetasin D. B., 46 vjeç, drejtues teknik në një subjekt për instalimin e paneleve fotovoltaike. Ai dyshohet për shkelje të rregullave të mbrojtjes në punë, pasi nga mungesa e masave të sigurisë është dëmtuar në dorë gjatë punës një punonjës 36-vjeçar.
Po ashtu, Policia bëri me dije se shtetasi R. J., 41 vjeç, banues në Korçë, i cili ishte larguar nga banesa më 24 shkurt, është gjetur dhe është rikthyer pranë familjes.
Ndërsa mëngjesin e sotëm, në spitalin e Prrenjasit është dërguar pa shenja jete një 47-vjeçar nga fshati Rodokal i Sipërm, Pogradec. Nga hetimet paraprake dyshohet se ai, në gjendje të rënduar psikologjike, ka konsumuar lëndë helmuese në banesë. Grupi hetimor vijon punën për sqarimin e plotë të rrethanave të ngjarjes.
