Strukturat e DVKM Korçë finalizuan me sukses operacionin policor të koduar “Itinerari 3”, në kuadër të masave të shtuara për goditjen e veprimtarisë së paligjshme të dhënies së ndihmës emigrantëve për kalim të paligjshëm të kufirit.
Si rezultat i hetimeve dhe punës operacionale intensive, u arrestua në flagrancë shtetasi M. S., 25 vjeç, banues në Darfur, Sudan, i cili në bashkëpunim me persona të tjerë që dyshohet se ndodhen në Greqi, ka ndihmuar 2 emigrantë të kalojnë ilegalisht kufirin nga Greqia drejt territorit të Shqipërisë, nëpërmjet kufirit të gjelbër në zonën e Devollit.
Emigrantët e parregullt u konstatuan nga shërbimet e Sektorit të Hetimit të Krimit të DVKM Korçë në malin Moravë.
Vijon puna për dokumentimin e plotë të rastit dhe identifikimin e personave të tjerë të implikuar në këtë veprimtari kriminale. Materialet procedurale i janë referuar Prokurorisë së Korçës, për veprime të mëtejshme.
