Ka përfunduar në Korçë edicioni i katërt i festivalit ndërkombëtar të artit bashkëkohor, Gjon Mili Video Art Festival, aktivitet që për tre ditë me radhë e ktheu qytetin në një pikëtakim të artistëve, kineastëve dhe krijuesve nga vende të ndryshme të botës.
Festivali solli për publikun një program të larmishëm me video-art, filma të shkurtër, dokumentarë, ekspozita dhe projekte të artit bashkëkohor, duke promovuar dialogun kulturor dhe shkëmbimin artistik ndërkombëtar.
Mbrëmja përmbyllëse u zhvillua në ambientet e Teatri Andon Zako Çajupi, ku kitaristi italian Nicola Montella interpretoi vepra nga repertori i muzikës klasike dhe bashkëkohore.
“Është hera e parë që vij në Shqipëri dhe jam shumë i lumtur që po jap këtë koncert në Korçë. Qyteti është shumë i bukur. Më thanë se Korçën e quajnë ‘Parisi i Vogël’, ndaj jam shumë i lumtur që interpretoj edhe një vepër franceze romantike, të shkruar në nder të Parisit dhe Korçës. Më pëlqen shumë atmosfera këtu. Tema e koncertit është dashuria”, u shpreh Montella.
Në përfundim të këtij edicioni, krijuesja e festivalit, Yllka Gjollesha, bëri të ditur se aktiviteti do të zgjerohet edhe në jug të vendit në edicionet e ardhshme.
“Gjon Mili Video Art Festival” konfirmoi edhe një herë rolin e tij si një nga ngjarjet më të rëndësishme kulturore në Korçë, duke sjellë artistë dhe krijimtari nga mbarë bota dhe duke e kthyer qytetin në një qendër të rëndësishme të artit bashkëkohor ndërkombëtar.
