IEVP Korçë vijon të shënojë hapa të rëndësishëm në drejtim të rehabilitimit dhe integrimit social të të burgosurve, përmes arsimit dhe aftësimit profesional. Së fundmi, kanë përfunduar me sukses kurset profesionale të Pastiçerisë dhe Rrobaqepsisë, duke u ofruar pjesëmarrësve aftësi konkrete për punësim pas vuajtjes së dënimit.
Në këtë kuadër, titullari i institucionit, z. Lorent Nake, së bashku me Përgjegjësin e sektorit social, z. Dejan Selman, zhvilluan një takim me drejtoreshën e Qendrës së Formimit Profesional Korçë, znj. Adela Myteberi, dhe stafin e saj. Gjatë takimit u shpreh mirënjohja për bashkëpunimin e deritanishëm dhe mbështetjen e vazhdueshme në realizimin e programeve profesionale brenda institucionit.
Po ashtu, u diskutua edhe planifikimi i kurseve profesionale për vitin 2026, të cilat pritet të përfshijnë:
- Aftësi për punësim, me fokus përgatitjen për tregun e punës
- Gjuhë të huaja, për zgjerimin e horizonteve profesionale
- Aftësi dixhitale, të domosdoshme në epokën e teknologjisë
- Instalime hidraulike, si profesion i kërkuar në treg
- Berber, si mundësi punësimi në sektorin e shërbimeve
- Rifillimin e kursit të Rrobaqepsisë, për forcimin e aftësive praktike dhe kreativitetit
Ky bashkëpunim institucional përfaqëson një investim të drejtpërdrejtë në aftësitë dhe perspektivën e personave të privuar nga liria, duke u krijuar atyre mundësi reale për një rikthim të suksesshëm në shoqëri.
IEVP Korçë vijon të mbetet një shembull pozitiv në zbatimin e politikave rehabilituese, duke dëshmuar se arsimimi dhe formimi profesional janë ura kyçe drejt ndryshimit dhe integrimit social.
