Vetëm pak kilometra larg Tiranës, kodrat e gjelbra të Pashkasheshit po ndryshojnë ndjeshëm pamje nga aktiviteti intensiv i nxjerrjes së inerteve dhe gurit gëlqeror. Pamjet nga zona tregojnë sipërfaqe të mëdha të zhveshura nga vegjetacioni, prerje të faqeve të malit dhe ndërhyrje të dukshme në reliev.
Banorët e zonës shprehen të shqetësuar për dëmtimin e peizazhit natyror, pluhurin, zhurmat dhe ndikimin afatgjatë që aktiviteti minerar mund të ketë mbi mjedisin. Nga ana tjetër, mbetet për t’u verifikuar nëse të gjitha subjektet që operojnë në zonë po respektojnë kushtet e lejeve mjedisore dhe detyrimet për rehabilitimin e territoreve të shfrytëzuara.
Nga të dhënat publike rezulton se në zonën e Pashkasheshit kanë zhvilluar aktivitet minerar disa kompani. Shoqëria LNK sh.p.k., me administratore Engjëllushe Kurti, ka në objektin e saj të veprimtarisë shfrytëzimin e gëlqerorëve në Pashkashesh.
Po ashtu, kompania ALLKURTI sh.p.k. rezulton të ushtrojë aktivitet në zonën e quajtur “Mali i Pashkasheshit”. Sipas të dhënave të publikuara, ortakë të saj janë Luan Allkurti dhe Bledar Allkurti.
Dokumente të publikuara nga Agjencia Kombëtare e Mjedisit tregojnë gjithashtu se në vitin 2024 është paraqitur për procedura mjedisore edhe një projekt i shoqërisë KELI INERTE sh.p.k. në Pashkashesh.
Ndërkohë, ekziston edhe shoqëria PASHKASHESH sh.p.k., e regjistruar prej vitesh me aktivitet që përfshin shfrytëzim guroresh dhe prodhim inertesh. Sipas të dhënave të publikuara, aksionerët e deklaruar përfshijnë Agron Jaupllarin dhe Aleksandër Gjokën.
Pyetja që kërkon përgjigje nga institucionet mbetet: A po respektohen kushtet mjedisore, kufijtë e lejeve minerare dhe detyrimet për rehabilitimin e zonës pas shfrytëzimit? Përgjigjja e kësaj pyetjeje është thelbësore për të kuptuar nëse zhvillimi ekonomik po ecën paralelisht me mbrojtjen e natyrës apo në kurriz të saj.
