Drejtoria Vendore e Policisë Korçë bën me dije se gjatë 24 orëve të fundit janë ndërmarrë disa masa penale për shkelje të ndryshme të ligjit në territorin e qarkut.
Shërbimet e Sektorit të Qarkullimit Rrugor arrestuan në flagrancë shtetasin Xh. P., 30 vjeç, banues në fshatin Lavdar, Korçë, pasi u kap në rrugën e fshatit Drenovë duke drejtuar automjetin pa leje drejtimi.
Nga Specialistët për Hetimin e Krimeve të Komisariatit të Policisë Korçë u arrestua në flagrancë shtetasi S. B., 28 vjeç, banues në Korçë, i cili dyshohet se ka ushtruar dhunë fizike dhe psikologjike ndaj babait të tij, si dhe ka dëmtuar me sende të forta disa orendi në banesë.
Ndërkohë, Specialistët për Hetimin e Krimeve të Komisariatit të Policisë Pogradec referuan materialet në Prokurori dhe filloi procedimi penal për një 14-vjeçar, banues në fshatin Velçan, pasi dyshohet se është konfliktuar fizikisht me një 17-vjeçar, për motive të dobëta.
Po nga Policia Kolonjë, u referuan materialet në Prokurori për shtetasin A. B., 61 vjeç, banues në fshatin Selenicë, i cili u konstatuan në afërsi të fshatit Qafëzez duke transportuar me kamion lëndë drusore pa leje. Sasia e druve dhe mjeti u sekuestruan në cilësinë e provës materiale.
Gjithashtu, shërbimet e Komisariatit të Policisë Maliq referuan materialet në Prokurori për shtetasin K. B., 39 vjeç, banues në fshatin Rëmbec, pasi dyshohet se ka kanosur me fjalë shtetasin N. P., për motive të dobëta.
Materialet procedurale i janë referuar Prokurorisë së Korçës për veprime të mëtejshme ligjore.
