Pogradec/ Kryetari i Bashkisë Pogradec, Ilir Xhakolli, ka inspektuar punimet që po kryhen për asfaltimin e rrugëve të brendshme në fshatin Buçimas. Projekti i cili ka gjetur financim nga Fondi Shqiptar i Zhvillimit ka për qëllim përmirësimin e infrastrukturës rrugore për banorët dhe lëvizjen e automjeteve.
Në pjesën më të madhe të rrugëve tashmë është përfunduar asfaltimi, duke i dhënë banorëve akses dhe shërbime më të mira, të cilat kanë munguar historikisht.
Gjatë inspektimit, kryebashkiaku Xhakolli bëri me dije se është riaplikuar projekti edhe për disa rrugica të mbetura në Buçimas, ndërsa paralelisht pritet të nisë puna edhe në fshatrat e tjerë të njësisë si Vërdova, Rrëmenji, Unaza Rrëmenj–Gështenjas, Gurasi, Çerravë dhe Udënisht.
Asfaltimi i rrugëve të brendshme vjen pas ndërhyrjeve për riasfaltim, të bëra më herët në rrugët kryesore të këtyre fshatrave, të cilat u dëmtuan pas investimeve në kanalizimet e ujërave të përdorura. Ndërsa tashmë fokusi do të jenë rrugët e brendshme.
