Edi Rama ka përfituar një bursë nga një fondacion grek për të studiuar në Harvard, sipas asaj që ka zbuluar Niki Xhavella.
Sipas ish-deputetes së Listës Kombëtare të Demokracisë së Re (ND), Niki Xhavella, kryeministri shqiptar ka studiuar në Universitetin e Harvardit me një bursë të financuar nga një fondacion grek, ku vetë Xhavella mbante postin e zëvendëspresidentes.
Niki Xhavella, e cila ishte përgjegjëse për përzgjedhjen e bursistëve nga Europa Juglindore në Harvard, ka bërë të ditur përmes një postimi në platformën X (ish-Twitter) se ishte pikërisht ajo që përzgjodhi ish-kryetarin e Bashkisë së Tiranës për të studiuar me fonde të një fondacioni grek.
Sipas zonjës Xhavella, kushti kryesor për përfitimin e kësaj burse ishte që kandidati të kishte origjinë minoritare. Kryeministri shqiptar e plotësonte këtë kriter, pasi nëna e tij është greke, ndërsa sot ajo e cilëson këtë vendim si një “gabim madhor”.
Në reagimin e saj, Xhavella shkruan:
“Para 30 vitesh nuk ishte figurë e diskredituar. E përzgjodha bazuar në njohjen time shumë të mirë të Shqipërisë, për shkak të punës sime të mëparshme atje. Ishte gjysmë-minoritar, plotësonte kushtet e kërkuara (ishte kryebashkiak, gjë që nuk e kishin të tjerë minoritarë — ishte e detyrueshme të kishte funksion institucional) dhe ishte padyshim i aftë. Shqiptari tjetër që studiuam arriti të bëhej ministër i Financave; madje i kisha pagëzuar fëmijën (ai ndërroi jetë i ri). Nuk kishte asnjë qëllim të fshehtë. Për më tepër, në Europën Juglindore në atë kohë ishin shumë pak ata që plotësonin kushtet për arsimim në Harvard. Do të habiteni nëse shihni se cilët politikanë të Europës Juglindore kanë dalë nga ky fondacion. Yje!”
Postimi i zonjës Xhavella erdhi pas sulmit verbal të Edi Ramës ndaj gazetarit greko-amerikan John Defterios, gjatë një Samiti për Zhvillimin e Qëndrueshëm në Abu Dhabi, ngjarje që shkaktoi reagime të forta në Greqi.
