Rini Topçiu, banor i fshatit Ravonik, ka rrëfyer publikisht një nga episodet më të errëta të historisë së fshatit, kur në vitin 1967 ai drejtoi bashkëfshatarët e tij në prishjen e xhamisë dhe kishës, në zbatim të urdhrit të regjimit komunist për mbylljen e objekteve të kultit.
Sipas tij, urdhri ishte i prerë që rinia e fshatit të merrte pjesë në shkatërrimin e objekteve fetare, dhe ai ishte i pari që e zbatoi këtë vendim.
“Me urdhër të Enver Hoxhës u tha të prisheshin xhamia dhe kisha. Mblodha rreth 10 veta dhe në mëngjes filluam prishjen e xhamisë. Hyra i pari dhe shemba minarenë. Më pas shkuam në kishë dhe e prishëm të gjithën”, tregon i moshuari.
Sot, pas dekadash, Rini Topçiu shprehet i penduar për atë që ka bërë dhe thotë se shkatërrimi i xhamisë ka mbetur një peng i madh në jetën e tij. Ai kërkon që xhamia e fshatit të rindërtohet, në mënyrë që komuniteti të ketë sërish një vend për të kryer ritet fetare.
“Kam shkruar letra te Sali Berisha, te Edi Rama, te kryetari i qarkut. Kisha u ndërtua, por xhamia jo. Fshati më thotë ‘ti e prishe, ti duhet ta ndërtosh’. Është një peng që e mbaj ende”, shprehet ai.
Nga ana tjetër, kryeplaku i fshatit Ravonik, Arjan Farasholli, thotë se kërkesa për ndërtimin e xhamisë është e përbashkët për gjithë komunitetin, por problematika kryesore mbetet gjetja e një trualli të përshtatshëm.
“Në vendin ku ka qenë më parë xhamia, pronat janë blerë dhe ka probleme pronësie. Duhet gjetur një zgjidhje e arsyeshme dhe një vend i përshtatshëm për ndërtimin e saj”, shprehet ai.
Pjesa dërrmuese e banorëve të fshatit Ravonik i përkasin besimit mysliman dhe prej vitesh kërkojnë ndërtimin e një xhamie, për të pasur mundësinë e ushtrimit të riteve dhe praktikave fetare.
