Drejtoria Vendore e Policisë Korçë njofton se shërbimet e Komisariatit të Policisë Korçë kanë referuar materialet në Prokurori, ku ka nisur procedimi penal për disa shtetas.
Konkretisht, ka nisur procedimi penal ndaj shtetasit E. H., 41 vjeç, banues në Voskopojë, Korçë, pasi dyshohet se, në kundërshtim me vendimin e gjykatës, i ka shkuar në banesë dhe ka ushtruar dhunë psikologjike ndaj bashkëshortes së tij, e cila është e pajisur me urdhër mbrojtjeje.
Gjithashtu, ka nisur procedimi penal ndaj shtetasit V. O., 21 vjeç, banues në Korçë, pasi dyshohet se në lagjen nr. 17 të qytetit të Korçës, duke drejtuar automjetin e tij, ka kryer manovra të rrezikshme duke prishur qetësinë publike. 21-vjeçari është ndëshkuar edhe administrativisht nga shërbimet e Sektorit të Policisë Rrugore.
Nga ana tjetër, shërbimet e Komisariatit të Policisë Pogradec referuan materialet në Prokurori, ku nisi procedimi penal për shtetasin E. B., 36 vjeç, banues në fshatin Velçan, Pogradec, pasi u kap duke transportuar me një automjet tip kamion një sasi lënde drusore pa lejen përkatëse. Lënda drusore, së bashku me automjetin, u sekuestruan në cilësinë e provës materiale.
Ndërkohë, më datë 26.12.2025, shtetasja T. S. ka bërë kallëzim se, pas kthimit në banesën e saj në lagjen nr. 12 të Korçës, pas rreth dy muajsh mungesë, ka konstatuar se banesa i ishte vjedhur. Policia po punon për identifikimin dhe kapjen e autorëve.
Materialet procedurale i janë referuar Prokurorisë së Korçës për veprime të mëtejshme.
