Një aksident i pazakontë ka ndodhur këtë të martë në qytetin e Korçës, ku një automjet tip “Benz” ka goditur një mjet tjetër të parkuar dhe më pas është përmbysur në mes të rrugës.
Ngjarja ka ndodhur në afërsi të repartit të zjarrfikëses, brenda territorit urban të qytetit.
Sipas informacioneve paraprake, në automjetin tip “Benz” po udhëtonte një çift bashkëshortësh. Dyshohet se drejtuesi i mjetit është ndjerë papritur keq, duke humbur kontrollin e automjetit dhe për pasojë duke shkaktuar aksidentin.
Fatmirësisht, çifti ka pësuar vetëm lëndime të lehta. Ambulanca ka mbërritur menjëherë në vendngjarje dhe ka transportuar dy të lënduarit drejt urgjencës për ndihmë mjekësore.
Policia ndodhet në vendin e ngjarjes dhe po punon për zbardhjen e plotë të rrethanave të aksidentit.
