Kryetari i Këshillit Drejtues të Radio Televizionit Shqiptar, Fatjon Hoxhalli, gjatë raportimit vjetor të RTSH në Kuvendin e Shqipërisë, ka paralajmëruar nisjen e një reforme të thellë dhe tërësore të transmetuesit publik, e cila do të ndërmerret në partneritet me European Broadcasting Union (EBU), unionin më të madh të mediave publike në Evropë ku edhe RTSH është anëtare.
Hoxhalli deklaroi se që prej konstituimit, Këshilli Drejtues ka punuar për të garantuar pavarësinë editoriale, integritetin profesional dhe përdorimin me përgjegjësi të burimeve publike, por sfidat e mbartura ndër vite kërkojnë një ndërhyrje të plotë dhe jo zgjidhje fragmentare.
Sipas Hoxhallit, reforma synon rikonceptimin sistemik të çdo aspekti të RTSH-së, nga mënyra e financimit, te organizimi i brendshëm, kultura e punës, prodhimi i lajmit, platformat teknologjike, raportet me publikun dhe mekanizmat e matjes së impaktit publik.
“Ky është momenti për një ndryshim të guximshëm dhe gjithëpërfshirës. Vetëm me një riformatim të thellë mund ta heqim RTSH-në nga spiralet e problemeve të përsëritura dhe ta vendosim në një trajektore të qendrueshme për dekadat e ardhshme.”
Kryetari i Këshillit Drejtues konfirmoi se RTSH ka gjetur partnerin e duhur për këtë proces tek EBU dhe se puna praktike ka nisur.
“Në bashkëpunim me njësinë e specializuar të EBU-së për transformimin e transmetuesve publikë, po hartojmë një model të ri strategjik, të shoqëruar me plan veprimi. Brenda muajit nëntor do të mbërrijë në Tiranë misioni i parë teknik i ekspertëve të EBU-së.”
Hoxhalli e cilësoi këtë proces si një moment historik për transmetuesin publik, i cili prej vitesh është përballur me sfida të akumuluara dhe probleme strukturore. Ai theksoi se RTSH ndodhet në një udhëkryq vendimtar, mes barrës së së shkuarës dhe një mundësie të artë për rimodelim tërësor. Sipas tij, rikthimi i institucionit në standardin që meriton është i mundur vetëm me vullnet të përbashkët, vendimmarrje të guximshme dhe mbështetje institucionale, ndërsa partneriteti me EBU siguron vizionin dhe ekspertizën për ta çuar reformën përpara. Kjo ndërhyrje, tha ai, pritet të jetë më e thella në historinë e RTSH-së, duke ndërtuar një model modern, të qëndrueshëm, transparent dhe të orientuar plotësisht drejt publikut.
