Bashkia e Pogradecit ka festuar 90-vjetorin e Bibliotekës Publike “Mitrush Kuteli”, një ndër institucionet më të vjetra kulturore të qytetit, me një histori të pasur dhe kontribut të rëndësishëm në promovimin e leximit dhe kulturës në komunitet.
Aktiviteti jubilar u zhvillua pranë Qendrës Kulturore “Lasgush Poradeci”, ku morën pjesë përfaqësues të institucioneve qendrore dhe lokale, Akademisë së Shkencave, shtëpive botuese, si edhe dashamirës të librit dhe të kulturës.
Gjatë ceremonisë u prezantua historiku i bibliotekës dhe rrugëtimi i saj 90-vjeçar, ndërsa u theksua edhe vlera që mbart emri i shkrimtarit të madh Mitrush Kuteli. Në këtë kuadër, u ndanë certifikata vlerësimi për ish-punonjës të bibliotekës, lexues të grupmoshave të ndryshme si dhe përfaqësues të shtëpive botuese që kanë bashkëpunuar ndër vite me këtë institucion kulturor.
