Drejtoria Vendore e Policisë Korçë
Specialistët e Sektorit të Qarkullimit Rrugor arrestuan në flagrancë shtetasin M. Sh., 20 vjeç, banues në Korçë, pasi u kap duke drejtuar automjetin, pa leje drejtimi.
Shërbimet e Komisariatit të Policisë Korçë arrestuan në flagrancë shtetasin E. L., 34 vjeç, banues në Korçë, pasi ka thyer masën e sigurisë “Arrest në shtëpi”, caktuar nga Gjykata e Korçës.
Gjithashtu, referuan materialet në Prokurori, ku filloi procedimi penal për shtetasin V. S., pasi u kap duke kryer punime ndërtimi, pa leje.
Shërbimet e Komisariatit të Policisë Pogradec referuan materialet në Prokurori, ku filloi procedimi penal për shtetasin M. H., 18 vjeç, banues në fshatin Leshnicë, pasi dyshohet se është konfliktuar me 2 bashkëmoshatarë të tij, për motive të dobëta.
Gjithashtu, referuan materialet në Prokurori, pasi më datë 09.10.2025, në fshatin Çërravë, dyshohet se për shkak të një shkëndije elektrike, ka rënë zjarr në një stallë bagëtish në pronësi të shtetasit O. K., 40 vjeç dhe si pasojë e flakëve janë djegur 170 bagëti të imëta.
Shërbimet e Komisariatit të Policisë Maliq referuan materialet në Prokurori, ku filloi procedimi penal për shtetasin E. S., 39 vjeç, banues në Maliq, pasi dyshohet se nëpërmjet mashtrimit i ka marrë disa bagëti të imëta, një 44-vjeçari.
Gjithashtu, referuan materialet në Prokurori dhe shpallën në kërkim shtetasin O. A., 49 vjeç, banues në Libonik, pasi dyshohet se i ka vjedhur disa shpendë një 72-vjeçari.
Specialistët e Sektorit të Hetimit të Krimeve Ekonomike dhe Financiare referuan materialet në Prokurori dhe shpallën në kërkim shtetasin E. T., 46 vjeç, banues në Tiranë, i cili dyshohet se i ka marrë 3 celularë, nëpërmjet mashtrimit, një 40 vjeçari, i punësuar në një servis celularësh.
Në lidhje me informacionin e dhënë më datë 04.10.2025, për largimin e një 15-vjeçareje, nga banesa, kjo shtetase është paraqitur dje, në komisariat dhe ka deklaruar se ishte larguar me dëshirën e saj. Po vijojnë veprimet për sqarimin e plotë të rastit.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
