Në qytetin e Bilishtit, Bashkia Devoll organizoi aktivitetin e veçantë “Dita e Trashëgimisë Kulturore në Devoll”, në kuadër të Ditës Kombëtare të Trashëgimisë Kulturore. Pedonalja e qytetit u mbush me ekspozita të pasura ku u shfaqën veshje popullore tradicionale, punime artizanale dhe gatime të zonës së Devollit, duke sjellë para publikut pasuritë materiale dhe shpirtërore të krahinës. Në këtë aktivitet, një vend të veçantë zuri pjesëmarrja e nxënësve të shkollave të qytetit dhe të njësive administrative përreth, të cilët sollën kontributin e tyre me punime artizanale dhe produkte tradicionale.
Inola Zaçlli, nxënëse e klasës së nëntë nga shkolla e Menkulasit, tregoi se kishin përzgjedhur punime artizanale për t’i prezantuar, ndërsa theksoi rëndësinë e mësimit për të vlerësuar traditat.
Letisia Galo, nga shkolla “Shaban Pajo” në Sul, solli gatime tradicionale të zonës si lakrorin me dy petë, petullat, tërhana, e shumë ushqime të tjera. Ajo shprehu kënaqësinë që si nxënëse kishte mundësinë të promovonte kulturën e krahinës së saj.
Ndërkohë, Bianka Kaso nga klasa e nëntë e shkollës “Dritëro Agolli”, u shpreh se ndihej e lumtur që mori pjesë në një aktivitet kaq të rëndësishëm, ku nxënësit sollën objekte të vjetra, veshje popullore, punime artizanale e gatime tradicionale që tregojnë identitetin dhe historinë e Devollit.
Përgjegjësja e sektorit të trashëgimisë kulturore pranë Bashkisë Devoll, Elona Uzhuri, theksoi se kjo ditë është shndërruar në një festë kombëtare që nga viti 2003 dhe ka në themel mbrojtjen e vlerave të trashëgimisë. Ajo shtoi se këtë vit është angazhuar brezi i ri, nxënësit dhe të rinjtë, si ambasadorë të ruajtjes dhe promovimit të këtyre vlerave.
Ndërkohë, koreografi Nikolla Ceka nënvizoi pasurinë e madhe folklorike të Devollit, ku një vend të veçantë e zë vallja devolliçe, e cila konsiderohet si thesar, emblemë dhe kurorë e çdo devolliu.
Ky aktivitet u përmbyll mes atmosferës festive dhe krenarisë për trashëgiminë kulturore, duke i dhënë një mesazh të qartë brezave të rinj, ku ruajtja e vlerave është mënyra më e mirë për të forcuar identitetin dhe për ta përcjellë atë brez pas brezi.
