Drejtoria Vendore e Policisë Korçë ka bërë me dije se specialistët e Seksionit për Hetimin e Krimeve ndaj Personit kanë arrestuar në flagrancë një 19-vjeçar, i dyshuar për plagosje me thikë.
Ngjarja ka ndodhur mbrëmjen e djeshme në fshatin Bulgarec, ku shtetasi me iniciale A. M., banues në këtë fshat, dyshohet se ka goditur me mjet prerës një 16-vjeçar, për motive të dobëta. I mituri është transportuar në spitalin e Korçës, ku ndodhet jashtë rrezikut për jetën. Në cilësinë e provës materiale, policia ka sekuestruar thikën dhe celularin e të arrestuarit.
Ndërkohë, specialistët për Hetimin e Krimeve në Komisariatin e Policisë Pogradec kanë referuar materialet në Prokurori për dy raste të tjera. Në rastin e parë, shtetasit I. S., 28 vjeç dhe N. S., 30 vjeç, banues në fshatin Buçimas, dyshohet se janë konfliktuar fizikisht me një 29-vjeçar në fshatin Gështenjas, për motive të dobëta. Në rastin e dytë, procedimi penal ka nisur për dy shtetas të mitur, të cilët dyshohet se kanë goditur një të moshuar në lagjen nr. 1 në Pogradec.
Po ashtu, specialistët e Komisariatit të Policisë Korçë kanë referuar materialet në Prokurori për një rast aksidental, ku një 29-vjeçar nga fshati Zëmblak, Maliq, ka dëmtuar gishtin e dorës gjatë punës me një pajisje në një subjekt për përpunimin e plastmasës.
Të gjitha materialet procedurale i janë referuar Prokurorisë së Korçës për veprime të mëtejshme.
