Trajneri i Skënderbeut, Ernest Gjoka doli i buzëqeshur pas triumfit 0-1 ndaj Pogradecit, me një gol të shënuar në minutat shtesë, në një nga derbit më të zjarrtë të juglindjes. Trajneri e pranoi se skuadra e tij ka ende për të përmirësuar, por vuri theksin tek vlera e 3 pikëve të marra në një terren të vështirë.
“E rëndësishme është fitorja, pavarësisht se kemi gjëra për të rregulluar. Kishim mundësitë tona, por përballë kishim Pogradecin, një skuadër shumë të mirë e dinjitoze, që na hapi probleme sidomos në pjesën e parë. Në fraksionin e dytë ndryshuam diçka dhe gjërat shkuan më mirë,” u shpreh Gjoka.
Tekniku foli edhe për presionin e madh që ndjehet në një qytet me objektiva të qarta për ngjitjen në Superiore: “Momentet e para ishin të vështira. Jemi në një qytet që ka kërkesa të mëdha për të dalë në elitë dhe presioni është i madh. Trajneri i Pogradecit e kishte përgatitur mirë ndeshjen, duke na mbyllur pikat për nxjerrjen e topit. Na u vështirësua pak, por gradualisht morëm kontrollin. E dimë që 25-30 minutat e para gjithmonë janë të zjarrta, të gjithë duan të fitojnë, është ai 30-minutëshi i çmendurisë.”
Gjoka pranoi se ekipi i tij ende po vuan në finalizim dhe shpesh kalon në nervozizëm kur nuk e gjen golin herët: “Po na bën të vuajmë fakti që nuk shënojmë shpejt. Kur nuk e bëmë 1, 2 ose 3 herë, ekipi hyn në nervozizëm dhe çdo moment kundërshtari mund të shënojë. Po punojmë që të jemi më cinikë para portës, por gjithçka ka kohën e vet,” përfundoi ai për mikrofonin e “RTSH Sport”.
Me këtë fitore, skuadra e Gjokës merr jo vetëm tri pikë të arta, por edhe një dozë të madhe morali në rrugën e gjatë drejt objektivit kryesor: ngjitjes në Superiore.
