Prof. Jovan Basho është një nga figurat më të respektuara të mjekësisë shqiptare, me një kontribut të çmuar prej dekadash në shërbim të pacientëve dhe studentëve. I njohur për profesionalizmin, përkushtimin dhe modestinë e rrallë, ai ka lënë gjurmë të thella si mjek dhe pedagog i shquar në Shërbimin e Gastrohepatologjisë.
Një pogradecar i denjë, i cili me qytetin ruan gjithmonë lidhje të ngushta, Prof. Basho është nipi i doktor Jani Bashos, personalitet i shquar që njihet gjerësisht si “Babai i mjekësisë shqiptare”. Tradita familjare dhe trashëgimia e brezave kanë ndikuar në formimin e tij si një figurë me vlera të mëdha profesionale dhe humane.
Përveç rolit të tij si mjek praktikues dhe formues breznish të tëra studentësh, Prof. Basho ka dhënë një ndihmesë të vyer edhe në fushën e kërkimit shkencor, duke qenë pjesë e redaksive ndërkombëtare dhe duke publikuar studime që kanë pasuruar literaturën mjekësore.
Personaliteti i tij shquhet edhe jashtë mureve të fakultetit dhe spitaleve. Si filatelist i apasionuar, Prof. Basho ka promovuar kulturën dhe historinë shqiptare përmes pullës postare, duke e kthyer atë në një mjet të veçantë komunikimi kulturor dhe njohjeje për vendin tonë.
I drejtpërdrejtë dhe kritik konstruktiv, gjithmonë në mbrojtje të integritetit akademik dhe etikës profesionale, Prof. Jovan Basho mbetet një shembull i gjallë se veprat vlejnë më shumë se fjalët.
Një figurë e rrallë që i bashkon në mënyrë unike dijen, kulturën dhe dashurinë për vendin.
