Saleh Nasr mbetet te Skënderbeu, sot rikthehet në stërvitje
Pas ditëve të fundit ku u përfol për një largim të mundshëm nga Skënderbeu, tashmë gjithçka është sqaruar. Sulmuesi egjiptian, Saleh Nasr, do të vijojë aventurën e tij me bardhekuqtë dhe është konfirmuar se sot do të jetë në stërvitje nën urdhërat e trajnerit Ernest Gjoka.
Burime pranë klubit korçar bëjnë me dije se dilemat për të janë mbyllur, pavarësisht incidentit të javës së kaluar, ku Nasr pati një konflikt me persona të tjerë. Situata tashmë është qetësuar dhe marrëdhëniet janë rikthyer në normalitet.
Nga ana tjetër, Skënderbeu është i gatshëm të lëshojë vetëm për shifra të konsiderueshme financiare dy sulmuesit e tij kryesorë, Nasr dhe Bismark, por deri më tani nuk ka asnjë ofertë konkrete.
Prania e Nasrit në skuadër shihet si një lajm shumë pozitiv, jo vetëm për grupin, por edhe për tifozërinë bardhekuqe, që e vlerëson si një nga lojtarët më të rëndësishëm të ekipit.
