Një vajzë nga Korça po bën krenar jo vetëm qytetin e saj, por të gjithë Shqipërinë. Xhoela, e cila nisi rrugëtimin e saj akademik në “Preca College”, ka arritur majat e ekselencës shkencore, nga auditorët më të mira të Turqisë deri te laboratorët e kërkimit shkencor në SHBA.
Ajo përfundoi studimet në Universitetin Teknik të Stambollit në degën Biologji Molekulare dhe Gjenetikë, me një minor në Ekonomi, ku u diplomua si valedictorian e Fakultetit të Shkencave dhe Letërsisë, duke u renditur në 0.4% më të mirët e të gjithë studentëve të universitetit. Për rezultatet e saj të shkëlqyera, u nderua me Bursën e Ekselencës nga Qeveria Shqiptare dhe Bursën e Suksesit nga Qeveria Turke, ndërsa fitoi edhe dy bursa Erasmus për kërkime shkencore në Spanjë dhe Gjermani.
Aktualisht, Xhoela është studente doktorature në Dartmouth College në SHBA, ku hulumton dinamikën qelizore dhe organelore në trurin e gjallë, si pjesë e programit të financuar nga American Heart Association dhe Albert J. Ryan Foundation. Kërkimi i saj ka rëndësi të jashtëzakonshme për zhvillimin e shëndetshëm të trurit dhe për trajtimin e sëmundjeve neurodegjenerative, metabolike dhe atyre të lidhura me moshën. Për punën e saj, ajo është nderuar me çmime prestigjioze si Scientific Merit Award dhe Trainee Professional Development Award nga Shoqata Amerikane e Neuroshkencës.
Por kontributi i Xhoelës nuk ndalet vetëm në laboratorë. Ajo është e angazhuar edhe në ndërthurjen e kërkimit akademik me zbatime konkrete në mjekësi, përmes bashkëpunimit me Celdara Medical si një nga High Potential Entrepreneur Fellows.
E pasionuar për zhvillimin e grave në shkencë, Xhoela ka qenë përfaqësuese studentore në Komitetin e Biologjisë Molekulare dhe Qelizore në Dartmouth dhe përfaqëson universitetin në rrjetin “New England Graduate Women in Science and Engineering”. Ajo është shpallur një nga “Leaders of Tomorrow” nga organizata ndërkombëtare Global Biotech Revolution dhe sot është ambasadore e saj, duke punuar për të themeluar një degë lokale të bioteknologjisë. Gjithashtu, është pjesë e iniciativës globale Homeward Bound, që rendit 100+ gratë më të fuqishme në shkencë, teknologji, inxhinieri, matematikë dhe mjekësi (STEMM), përmes së cilës ka përfunduar një program njëvjeçar lidershipi dhe angazhim në projekte ndërkombëtare.
Përtej shkencës, Xhoela është një shpirt i lirë: flet gjashtë gjuhë, adhuron udhëtimet, kulturat e ndryshme dhe aktivitetet në natyrë si hiking dhe kajak.
Nga bankat e shkollës në Korçë deri te laboratorët e trurit në Amerikë, historia e saj është një frymëzim për çdo të ri shqiptar që beson në ëndrra, punë të palodhur dhe arritje pa kufij.
