Një ngjarje e rëndë ka ndodhur pasditen e sotme në qytetin e Korçës, pranë një lagjeje afër spitalit rajonal, ku një 60-vjeçar është gjetur i pajetë në shkallët e pallatit ku banonte.
Sipas burimeve paraprake, burri ishte duke u kthyer në banesë kur papritur është rrëzuar dhe ka humbur ndjenjat. Kanë qenë bashkëshortja dhe djali i tij që e kanë gjetur në gjendje të rëndë dhe kanë njoftuar menjëherë Policinë dhe ambulancën.
Pavarësisht përpjekjeve për ndihmë të shpejtë, ai nuk ka mundur të mbijetojë. Dyshohet se 60-vjeçari vuante nga tensioni i lartë i gjakut, por shkaqet e sakta të vdekjes mbeten ende të paqarta.
Trupi është dërguar në morg për kryerjen e ekspertizës mjeko-ligjore, e cila pritet të sqarojë rrethanat e plota të kësaj ngjarjeje të dhimbshme.
